Трамп Макка келишувини Яқин Шарқнинг бирлашуви деб атади
АҚШ президенти мазкур битим минтақа давлатларининг ўзини ҳимоя қилиш имкониятларини кучайтиришини таъкидлаган.
АҚШ президенти Доналд Трамп Саудия Арабистони, Туркия ва Покистон ўртасида имзоланган Макка мудофаа келишувини Яқин Шарқ давлатларининг бирлашуви ва минтақада хавфсизликни мустаҳкамлаш йўлидаги муҳим қадам сифатида баҳолади. Бу ҳақда у Truth Social'даги саҳифасида ёзиб қолдирган.
Трамп Саудия Арабистони, Туркия ва Покистон раҳбариятини келишув имзолангани билан табриклаб, унинг Яқин Шарқ давлатлари ўзини янада самарали ҳимоя қилиш имкониятларини кучайтиришини таъкидлаган.
Макка келишуви 7 август куни Саудия Арабистони, Покистон ва Туркия томонидан имзоланган. Ҳужжатга кўра, иштирокчи давлатлардан бирига уюштирилган қуролли ҳужум барча томонларга қарши тажовуз сифатида баҳоланади. Шунингдек, разведка маълумотлари алмашиш ва минтақавий хавфсизликни таъминлаш борасида ҳамкорликни кучайтириш кўзда тутилган.
Туркия ташқи ишлар вазири Ҳакан Фидан келишув механизмини НАТОнинг жамоавий мудофаани назарда тутувчи 5-моддасига қиёслаган.
Шунингдек, айрим хабарларга кўра, келгусида минтақадаги бошқа давлатлар, жумладан, Мисрнинг ҳам мазкур келишувга қўшилиши мумкин.
