Урганч халқаро аэропортида йўловчиларга хизмат кўрсатиш қуввати соатига 300 нафардан 1 минг 300 нафаргача ортади
Президент Урганч халқаро аэропортининг расмий делегациялар учун мўлжалланган янги терминалини кўздан кечирди.
Президент Шавкат Мирзиёевнинг Хоразм вилоятига ташрифи Урганч халқаро аэропортидаги бунёдкорлик ва реконструкция ишлари билан танишишдан бошланди.
Бугунги кунда Хоразмга келаётган сайёҳлар ва хорижий меҳмонлар оқимининг ортиб бораётгани аэропорт инфратузилмасини замонавий талаблар асосида ривожлантиришни тақозо этмоқда.
Урганч халқаро аэропортини кенгайтириш ва модернизация қилиш лойиҳасига 264 миллион доллар инвестиция йўналтирилган. Лойиҳа давлат-хусусий шериклик асосида амалга оширилмоқда. Унинг хусусий ҳамкори сифатида Жанубий Кореянинг “Incheon International Airport Corporation” компанияси жалб этилган.
Реконструкция доирасида аэропортда “Boeing 747” ва “Airbus А350” каби кенг фюзеляжли самолётларни қабул қилиш имконияти яратилади. Бу Хоразмга дунёнинг турли қитъаларидан тўғридан-тўғри узоқ масофали авиақатновларни йўлга қўйиш имконини беради.
Лойиҳанинг биринчи босқичида 18 та ҳаво кемаси тураргоҳи ва янги бурилиш йўлаги барпо этилади. Шунингдек, замонавий чегара назорати ва виза бўлимлари, бизнес-зал, савдо ва овқатланиш шохобчалари, тиббиёт пункти ҳамда “Duty Free” зонаси ташкил этилади.
Лойиҳа якунлангач, аэропортнинг йўловчиларга хизмат кўрсатиш қуввати соатига 300 нафардан 1 минг 300 нафаргача оширилади.
Президент аэропортнинг модернизацияси Хоразмнинг туристик салоҳиятини янада ошириш, халқаро алоқаларни кенгайтириш ва ҳудудда йирик халқаро тадбирларни ўтказиш учун зарур инфратузилмани шакллантиришда муҳим аҳамиятга эга эканини таъкидлади.
