Ёшлар замонавий меҳнат бозорида талаб юқори бўлган касбларга ўқитилади

Президент Шавкат Мирзиёев Урганч шаҳридаги Хоразм илғор касбий маҳорат техникуми ҳамда унинг ҳудудида ташкил этилган Касблар шаҳарчаси фаолияти билан танишди.

 

Мазкур муассасада меҳнат бозори талабларига мос, замонавий билим ва амалий кўникмаларга эга мутахассисларни тайёрлашга алоҳида эътибор қаратилган. Таълим жараёнида иш берувчилар эҳтиёжи, илғор хорижий тажриба ва дуал таълим тизими уйғунлаштирилган.

 

Техникумни ташкил этиш учун давлат бюджетидан 72,4 миллиард сўм ажратилган. 5,2 гектар майдонда 1 минг 100 ўринга мўлжалланган иккита ўқув биноси, 300 ўринли ётоқхона, спорт зали, 200 ўринли ошхона ва замонавий жиҳозланган ўқув устахоналари барпо этилган.

 

Бу ерда Германия, Швейцария, Буюк Британия, Хитой ва Жанубий Кореянинг илғор таълим дастурлари асосида мутахассислар тайёрланмоқда. 2026–2027-ўқув йили учун 11 та касб йўналишига 200 нафар иқтидорли ёш имтиҳон асосида сараланган.

 

Таълим иш берувчи корхоналар билан ҳамкорликда ташкил этилиб, ёшларнинг эгаллаган касби бўйича бандлигини таъминлашга эътибор қаратилмоқда.

 

Техникум нафақат ўз ўқувчилари, балки вилоятдаги бошқа касбий таълим муассасалари учун ҳам амалий база вазифасини бажармоқда. Ҳозирда ҳудуддаги таълим муассасаларининг қарийб 4 минг 300 нафар ўқувчиси мазкур мажмуанинг устахона ва лабораторияларида амалиёт ўтамоқда.

 

Давлат раҳбари Касблар шаҳарчасида яратилган шароитлар билан ҳам танишди. Бу ерда ёшларнинг қизиқиш ва қобилиятини эрта аниқлаш, уларни касбга йўналтириш ҳамда амалий кўникмаларини ривожлантириш имкониятлари яратилган.

 

Шаҳарчада «Ўзинг ясаб кўр» тамойили асосида транспорт ва логистика, саноат ва қурилиш, сервис, қишлоқ хўжалиги ҳамда «яшил» энергетика каби йўналишлар бўйича машғулотлар ташкил этилган.

 

Президент ёшларни замонавий меҳнат бозори талабларига мос касбларга сифатли тайёрлаш, таълим дастурларини иш берувчилар эҳтиёжига мослаштириш ва Хоразмдаги илғор тажрибани бошқа ҳудудларда ҳам кенгайтириш муҳимлигини таъкидлади.