Ўзбекистон ва Туркия журналистлари медиа соҳасидаги ҳамкорликни кенгайтиради

 

Ўзбекистон Журналистлар уюшмаси вакиллари Туркиянинг Баликесир шаҳрида Баликесир журналистлар жамияти ташкил этилганининг 10 йиллиги муносабати билан ўтказилган тадбирда иштирок этди.

 

     

 

Маросимда Ўзбекистон Журналистлар уюшмаси раиси Шуҳрат Орипов Ўзбекистон ва Туркия ўртасида медиа соҳасидаги ҳамкорлик изчил ривожланиб бораётганини таъкидлаб, Баликесир журналистлар жамияти раҳбарияти ва аъзоларини юбилей сана билан табриклади.

 

Тадбир доирасида Баликесир журналистлар жамияти раиси Семра Аман Акюрек билан учрашув ўтказилиб, журналистика ва медиа соҳасидаги ҳамкорликни кенгайтириш масалалари муҳокама қилинди.

 

     

 

Учрашув якунида Баликесир журналистлар жамияти ҳамда Ўзбекистон Журналистлар уюшмасининг Бухоро вилояти бўлими ўртасида ҳамкорликни йўлга қўйиш бўйича келишувга эришилди.

 

Ҳамкорлик доирасида журналистлар малакасини ошириш, рақамли медиа, сунъий интеллект ва замонавий технологиялар бўйича қўшма ўқувлар ташкил этиш режалаштирилмоқда. Шунингдек, Бухоро ва Баликесир шаҳарларида медиафорумлар, семинар-тренинглар, маҳорат дарслари ҳамда онлайн таълим дастурларини ўтказиш масалалари кўриб чиқилди.

 

     

 

Томонлар Ўзбекистон ва Туркия ўртасидаги дўстлик ва қардошлик муносабатларини, шунингдек, тарих, маданият, адабиёт, туризм, иқтисодиёт ва гуманитар алоқаларни оммавий ахборот воситалари ҳамда ижтимоий тармоқларда кенг ёритишга қаратилган қўшма медиа лойиҳаларни амалга ошириш муҳимлигини қайд этди.

 

     

 

Келгусида журналистика этикаси, ишончли ва холис ахборот тарқатиш, фактларни текшириш, медиа саводхонликни ошириш ҳамда дезинформацияга қарши курашиш йўналишларида ҳам ҳамкорлик қилиш имкониятлари муҳокама қилинди.