Андижонда ЙПХдан қочишга уринган Оniх ҳайдовчиси ЙТҲга учради
Қочиш вақтида бошқарувни йўқотган автомобиль дўконга урилган.
Андижон шаҳрида тегишли ҳужжатларсиз Оniх бошқарган ҳайдовчи ЙПХ ходимининг тўхташ талабига бўйсунмай, қочишга уринган. Ҳаракат давомида у руль бошқарувини йўқотиб, йўл четидаги дўконга бориб урилган. Бу ҳақда вилоят ЙҲХБ матбуот хизмати хабар берди.
Ҳодиса 17 август куни соат 01:10 атрофида Машраб кўчасида содир бўлган. ЙПХ ходимлари Оniх ҳайдовчисига тўхташ ишорасини берган, бироқ у қонуний талабни бажармасдан Ломоносов кўчаси томон ҳаракатини давом эттирган.
Шундан сўнг ҳайдовчи бошқарувни йўқотиб, автомобилни йўл четидаги дўконга урган.
Текширув давомида 1999 йилда туғилган У. М. автомашинани тегишли ҳужжатларсиз бошқаргани аниқланган. Шунингдек, транспорт воситасига нисбатан муддати ўтган 10 миллион сўмдан ортиқ қарздорлик мавжудлиги маълум бўлган.
Ҳолат юзасидан ҳайдовчига Маъмурий жавобгарлик тўғрисидаги кодекснинг 135-моддаси 2-қисми ҳамда 194-моддаси 1-қисми билан маъмурий баённома расмийлаштирилган. Автомобиль вақтинча сақлаш учун жарима майдонига жойлаштирилган.
ЙТҲ оқибатида ҳеч ким тан жароҳати олмаган, бироқ автомобилга техник шикаст етган. Ҳозирда ҳолат юзасидан белгиланган тартибда суриштирув ишлари олиб борилмоқда.
