Ғазода қуролсизланиш ва гуманитар масалалар бўйича икки ишчи гуруҳ тузилади
Қарор Нетаняху ва Тинчлик Кенгаши вакиллари иштирокидаги музокараларда қабул қилинди.
Исроил Бош вазири Бенямин Нетаняху ва Тинчлик Кенгаши вакиллари Ғазо секторидаги вазият бўйича икки ишчи гуруҳ тузиш тўғрисида келишиб олди. Бу ҳақда ТАСС Нетаняху идорасига таяниб маълум қилди.
Қуддусда АҚШ президенти Доналд Трампнинг куёви Жаред Кушнер иштирокида ўтказилган музокараларда Ғазони демилитаризация қилиш ва ҳудуддаги гуманитар вазиятни яхшилаш масалалари муҳокама қилинган.
Биринчи ишчи гуруҳ Ғазони қуролсизлантириш ва демилитаризация қилиш масалалари билан шуғулланади. Томонлар анклавда қайта қуриш ишлари бошланишидан аввал демилитаризация жараёни якунланиши кераклигини таъкидлаган.
Иккинчи гуруҳ эса санитария, тоза сув таъминоти ва Ғазо аҳолисининг бошқа соғлиқни сақлаш эҳтиёжлари билан боғлиқ масалаларга эътибор қаратади.
Исроил томони Ғазони қайта тиклаш жараёнининг бошланиши учун Ҳамаснинг қуролларини топширишини талаб қилмоқда. Бу жараён АҚШ назорати остида амалга оширилиши режалаштирилаётгани айтилмоқда.
Аввалроқ Нетаняху Тинчлик Кенгашининг Ғазо бўйича 15 банддан иборат режасини рад этиши ва Ҳамас тўлиқ қуролсизлантирилмагунча Исроил қўшинларини ҳудуддан олиб чиқмаслигини билдирган эди.
