Биринчи хато учун тадбиркорга жарима эмас, 10 кунлик муддат берилади

 

Президент Шавкат Мирзиёев тадбиркорлар билан очиқ мулоқотда бизнес вакилларига нисбатан қўлланаётган назорат ва маъмурий чораларни янада такомиллаштириш бўйича янги ташаббусларни маълум қилди.

 

Ҳозирда мамлакатда 51 та идора молиявий жарима қўллаш ваколатига эга. Айрим идораларда жарималардан тушган маблағнинг бир қисми ўша ташкилот ихтиёрида қолаётгани танқид қилинди. Бу эса назоратни профилактикадан кўра жарима ундиришга йўналтирувчи нотўғри ёндашувни юзага келтираётгани қайд этилди.

 

“Жарима маблағ йиғиш учун эмас, соҳада тартиб-интизом ва профилактика учун хизмат қилиши керак”, — деди Президентимиз.

 

Шу муносабат билан барча турдаги жарималар миқдори ўртача икки баробарга камайтирилади.

 

Шунингдек, давлат корхоналари томонидан харид қилинган товарлар бўйича тадбиркорларнинг закалат маблағларини қайтариш жараёни автоматлаштирилади.

 

Келаси йилдан тадбиркор ва давлат ўртасидаги низоларда “Тадбиркорнинг ҳақлилик презумпцияси” тамойили амал қилади.

 

Унга кўра, тадбиркорнинг айби судда исботланмагунча у айбсиз ҳисобланади. Шунга кўра, айби суд орқали тасдиқланмагунча тадбиркорга жарима ёки бошқа таъсир чораси қўлланмайди.

 

Бундан ташқари, “Биринчи хато учун огоҳлантириш” қоидаси жорий этилади.

 

Биринчи марта қоидабузарлик содир этган, бироқ одамлар ҳаёти, соғлиғи ёки мол-мулкига зарар етказмаган тадбиркорга камчиликни бартараф этиш учун 10 кун муддат берилади.

 

Суд жараёнларида ҳам тадбиркорлар манфаатини ҳимоя қилишга қаратилган янги тартиблар жорий этилади. Хусусан, назорат органлари биринчи инстанциядан кейинги ҳар бир суд босқичида давлат божини тўлайди.

 

Шунингдек, Савдо-саноат палатаси ҳузуридаги Эксперт кенгашининг ваколатлари кенгайтирилади. Эндиликда кенгашга божхона, қурилиш, санитария, карантин ва ветеринария соҳаларидаги низоларни ҳам кўриб чиқиш ваколати берилади.