Хоразм тадбиркорлар учун янги имкониятлар марказига айланмоқда — Президент
Хоразмга қисқа даврда 4 миллиард доллар хорижий инвестиция жалб қилиниб, 10 мингта янги ишлаб чиқариш қуввати ишга туширилди.
Президент Шавкат Мирзиёев Хоразмда сўнгги йилларда тадбиркорликни ривожлантириш учун мутлақо янги имкониятлар яратилганини таъкидлади.
Қайд этилганидек, қисқа даврда вилоят иқтисодиётига 4 миллиард доллар хорижий инвестиция жалб қилиниб, 10 мингта янги ишлаб чиқариш қуввати ишга туширилди. Ҳудудда «Ҳазорасп» махсус иқтисодий зонаси ва 31 та саноат зонаси ташкил этилди.
Тупроққалъа ва Янгиариқ туманларида умумий қуввати 275 мегаватт бўлган электр станциялари барпо этилиб, саноат корхоналарининг барқарор энергия таъминотига хизмат қилмоқда.
Бугунги кунда Хоразм иқтисодиётининг 72 фоизи кичик бизнес ҳиссасига тўғри келмоқда. Экспортда кичик бизнес улуши эса 81 фоизга етиб, вилоят бу кўрсаткич бўйича республикада биринчи ўринга чиқди.
Транспорт инфратузилмаси ҳам сезиларли даражада ривожланди. Ҳафталик авиарейслар сони 16 тадан 102 тага, темир йўл қатновлари эса 8 тадан 41 тага ошди. “Тошкент – Хива” тезюрар поезди қатнови йўлга қўйилди, 35 километрлик янги “Урганч – Хива” автомобиль йўли фойдаланишга топширилмоқда.
Туризм соҳасида ҳам янги лойиҳалар амалга оширилмоқда. 25 гектар майдонда “Арда Хива” туристик мажмуаси барпо этилди. Тадбиркорлар томонидан жами 7 минг ўринли 331 та меҳмонхона ва меҳмон уйи ташкил қилинди.
Жорий йилда Хоразмга 3 миллион нафар хорижий сайёҳ келиши кутилмоқда. Хивада меҳмонхона, савдо ва кўнгилочар объектларни ўз ичига олган “Саҳро юлдузи” туристик комплекси ҳам бунёд этилиши режалаштирилган.
“Бир сўз билан айтганда, бугун Хоразм тадбиркорлар учун янги имкониятлар марказига айланиб бормоқда”, — деди Президент.
