Имрон Хон соғлиғи сабаб қамоқхонадан касалхонага ўтказилди
Покистон Олий суди собиқ бош вазирни навбатдаги суд мажлисигача тиббий кўрик ва даволаниш учун касалхонага юбориш ҳақида қарор қабул қилди.
Покистон Олий суди коррупция айблови билан қамоқ жазосини ўтаётган собиқ бош вазир Имрон Хонни соғлиғи билан боғлиқ муаммолар сабаб касалхонага ўтказиш ҳақида қарор қабул қилди. Бу ҳақда Geo tv хабар берди.
Суд қарорига кўра, Имрон Хон навбатдаги суд мажлисигача тиббий кўрик ва даволаниш учун Шифа касалхонасига юборилади. Шунингдек, суд тегишли идораларга сиёсатчининг тўлиқ тиббий маълумотларини тақдим этиш бўйича кўрсатма берган.
Суд мухолифатдаги Адолат учун ҳаракат партиясидан собиқ бош вазирнинг соғлиғи билан боғлиқ масалани сиёсийлаштирмасликни ҳам сўраган.
Аввалроқ, февраль ойида Имрон Хоннинг адвокатлари унинг соғлиғи ёмонлашгани сабабли қамоқдан озод этилишини сўраб судга мурожаат қилган эди. Хусусан, қон қуйқаси унинг ўнг кўзидаги кўриш қобилиятига жиддий таъсир кўрсатгани билдирилган.
Адвокатлар, шунингдек, 2025 йил декабрида чиқарилган ҳукм ижросини тўхтатишни сўраган. Ушбу ҳукмга кўра, Имрон Хон давлат активлари — заргарлик буюмлари ва қимматбаҳо соатлар қийматини атайлаб камайтириб кўрсатиш билан боғлиқ коррупция иши бўйича 17 йилга озодликдан маҳрум этилган.
Имрон Хон 2018–2022 йилларда Покистон бош вазири лавозимида ишлаган. У 2022 йил 10 апрелда парламентдаги ишончсизлик вотумидан сўнг лавозимидан четлатилган.
Унинг рафиқаси Бушра Биби ҳам шу иш доирасида етти йилга озодликдан маҳрум этилган.
