Мандат натижалари эълон қилинди: 209 мингдан ортиқ абитуриент талаба бўлди
Бу йил олий таълимга қабулда давлат гранти бўйича ўртача ўтиш бали 134,6 балл, контракт бўйича 93,7 баллни ташкил этди.
2026/2027-ўқув йили учун олий таълим муассасаларининг бакалавриат таълим йўналишларига қабулнинг якуний натижалари эълон қилинди.
18 август куни Олий таълим, фан ва инновациялар вазирлигида ўтказилган матбуот анжуманида қайд этилишича, жорий йилда 209,1 минг нафар абитуриент бакалавриат таълим йўналишларига талабаликка тавсия этилган.
Шундан 52,8 минг нафари давлат гранти, 156,3 минг нафари эса тўлов-контракт асосида ўқишга тавсия этилган. Шунингдек, белгиланган имтиёзлар асосида алоҳида қабул кўрсаткичлари доирасида яна 20,5 минг нафар абитуриент талабаликка тавсия этилган.
Бу йил давлат гранти бўйича ўртача ўтиш бали 134,6 балл, тўлов-контракт бўйича эса 93,7 баллни ташкил этди.
Таққослаш учун, 2025/2026-ўқув йилида ўртача ўтиш баллари грант бўйича 121,8 балл, контракт бўйича 84,9 балл бўлган. Шу тариқа, бир йил давомида грант бўйича ўртача ўтиш бали 12,8 баллга, контракт бўйича эса 8,8 баллга ошган.
Вазирлик маълумотларига кўра, жорий йилда абитуриентлар энг кўп танлаган олий таълим муассасалари қаторидан Тошкент давлат иқтисодиёт университети, Ўзбекистон давлат жаҳон тиллари университети ва Ўзбекистон Миллий университети жой олди.
Таълим йўналишлари орасида эса энг юқори қизиқиш «Даволаш иши», «Иқтисодиёт» ҳамда «Филология ва тилларни ўқитиш: инглиз тили» йўналишларига кузатилган.
