“Одамларимиз четга чиқиб ишлашига зарурат қолмайди” — Шавкат Мирзиёев

 

Президент Шавкат Мирзиёев тадбиркорлар билан очиқ мулоқот якунида мамлакат иқтисодиётини янада ривожлантириш ва юқори ўсиш суръатларини сақлаб қолиш бўйича устувор вазифаларни белгилаб берди.

 

“Биз 40 миллионли халқмиз. Одамларимиз ҳаётини янада яхшилаш учун юқори иқтисодий ўсишни сақлаб қолишимиз зарур”, — деди давлат раҳбари.

 

Қайд этилганидек, жорий йилда ялпи ички маҳсулотни 180 миллиард доллардан, экспорт ҳажмини эса 40 миллиард доллардан ошириш мақсад қилинган.

 

Бу борада тадбиркорлар учун юқори даромадли иш ўринлари яратиш, қўшилган қиймат занжирларини кенгайтириш ва ташқи бозорларга чиқиш имкониятларини ошириш учун зарур шароитлар яратилади.

 

Ҳудудларнинг иқтисодий салоҳиятидан келиб чиқиб, янги ўсиш нуқталари шакллантирилади. Жумладан:

• Тошкентда экспортга йўналтирилган бизнес;

• Андижон, Фарғона ва Наманганда тўлиқ ишлаб чиқариш занжирига эга тўқимачилик ва машинасозлик;

• Самарқанд, Бухоро ва Хоразмда туризм, креатив индустрия ва агросаноат брендлари;

• Навоий ва Тошкент вилоятларида тоғ-кон, металлургия ва илмий кимё;

• Қашқадарё ва Сурхондарёда агросаноат ҳамда нефть-газ кимёси;

• Қорақалпоғистонда «яшил» энергетика, ахборот технологиялари ва сунъий интеллект;

• Жиззах ва Сирдарёда автомобилсозлик, электротехника ва қурилиш материаллари бўйича рақобатбардош кластерлар ривожлантирилади.

 

Давлатимиз раҳбари ҳудудларда айнан шу йўналишлар бўйича узун қўшилган қиймат занжирларини яратиш, ишлаб чиқариш ва экспортни кўпайтириш муҳимлигини таъкидлади.

 

“Ана шунда одамларимиз четга чиқиб ишлашига зарурат қолмайди, Янги Ўзбекистон тадбиркорлари янги ривожланиш босқичига чиқади. Ишончим комил, бунга кучимиз ҳам, имкониятимиз ҳам, салоҳиятимиз ҳам етади!” — деди Президент.