Тадбиркорлар учун “контр-кафолат” тизими жорий этилади

 

Президент Шавкат Мирзиёев тадбиркорлар билан очиқ мулоқотда кичик бизнес вакиллари учун муҳим бўлган гаров таъминоти масаласини енгиллаштириш бўйича янги тизим жорий этилишини маълум қилди.

 

Унга кўра, бизнеснинг ҳақиқий қийматини баҳолаш асосида кредит ажратиш имконини берадиган «контр-кафолат» тизими йўлга қўйилади.

 

Мазкур тизим доирасида 10 миллиард сўмгача бўлган кредитлар учун гаров таъминотининг 30 фоизини давлат, яна 30 фоизини Бизнесни кафолатлаш компанияси, 15 фоизини эса банклар ўз зиммасига олади. Натижада тадбиркорнинг ўзидан гаровнинг атиги 25 фоизини таъминлаш талаб этилади.

 

Шунингдек, тадбиркорларга солиқ масалаларида кўмаклашадиган “Виртуал солиқ маслаҳатчиси” ишга туширилди. Келаси йилдан бошлаб сунъий интеллект ёрдамчилари қурилиш, меҳнат муносабатлари, ташқи савдо ва давлат хизматлари соҳаларида ҳам жорий этилади.

 

Очиқ мулоқотда ҳудудларда мавжуд бўш имкониятлардан самарали фойдаланиш масаласига ҳам алоҳида эътибор қаратилди.

 

Давлат раҳбари минглаб гектар бўш ер майдонлари ва самарасиз фойдаланилаётган давлат активлари фақат улар асосида янги лойиҳалар амалга оширилиб, иш ўринлари яратилса ва экспорт таъминланса, ҳақиқий иқтисодий қиймат яратишини таъкидлади.

 

Шу мақсадда давлат активларини сотиб олиш шартлари ҳам енгиллаштирилади. Хусусан, аванс тўлови 30 фоиздан 15 фоизга туширилади. Актив қийматини олти ой ичида тўлиқ тўлаган тадбиркорларга 25 фоиз чегирма берилади.

 

Шунингдек, харид қийматининг 50 фоизини тўлаган тадбиркор қолган суммани 7 йил давомида фоизсиз бўлиб тўлаши мумкин бўлади.

 

Уч ой давомида сотилмаган давлат мулкининг бошланғич нархи босқичма-босқич 10 фоизгача пасайтирилади. Аукционларни ўтказиш муддати эса икки баробар қисқартирилади.