Тадбиркорликка оид давлат хизматларининг 50 фоизи “сукут – розилик” тамойилига ўтказилади
Ариза белгиланган муддатда кўриб чиқилмаса, у тадбиркор фойдасига ҳал қилинган ҳисобланади.
Президент Шавкат Мирзиёев тадбиркорлар билан очиқ мулоқотда бизнес юритиш учун зарур давлат хизматлари ва рухсат бериш тартиб-таомилларини янада соддалаштириш бўйича янги чораларни белгилади.
Эндиликда тадбиркорликка оид давлат хизматларининг 50 фоизи “сукут – розилик” тамойилига ўтказилади. Яъни тадбиркорнинг аризаси белгиланган муддатда кўриб чиқилмаса, у автоматик равишда тадбиркор фойдасига ҳал қилинган деб ҳисобланади.
Лицензия олиш бўйича рад этилган ҳар бир ариза Бизнес-омбудсман томонидан ўрганиб чиқилади. Асоссиз равишда рад этганлик учун масъул шахсларнинг жавобгарлиги кучайтирилади.
Шунингдек, тадбиркорлар учун ортиқча маъмурий тўсиқлар қисқартирилади. Яқин вақт ичида 30 дан ортиқ фаолият тури бўйича лицензия ва рухсатномалар бекор қилинади. Яна 35 та лицензия ва рухсатномани олиш муддати 2–3 баробарга қисқартирилади.
Бундан ташқари, 10 та рухсат бериш тартиби хабардор қилиш тартибига ўтказилади.
Озиқ-овқат маҳсулотларини экспорт қилишда ҳам ҳужжатларни расмийлаштириш соддалаштирилади. Ветеринария, санитария ва фитосанитария рухсатномалари ўрнига ягона “Саломатлик сертификати” жорий этилади.
Янги лицензия ёки рухсатнома талабини жорий этишдан аввал эса унинг амалий самарадорлиги учта ҳудудда олти ой давомида эксперимент тариқасида синовдан ўтказилади.
Мулоқотда тадбиркорлар мулкига ижро ҳужжатлари асосида тақиқ қўйилиши билан боғлиқ мурожаатлар кўплиги ҳам қайд этилди. Мазкур масалалар юзасидан алоҳида учрашув ўтказилиб, уларнинг тизимли ечимлари ишлаб чиқилади.
