Ўзбекистонда 27 миллиард долларлик 105 та йирик лойиҳа бошланади

 

Мамлакатда иқтисодий ўсишни янги босқичга олиб чиқиш, саноат ва инфратузилмани ривожлантиришга хизмат қиладиган йирик инвестиция лойиҳалари изчил амалга оширилмоқда.

 

Жумладан, Жиззахда атом электр станцияси, Олмалиқда тўртинчи мис бойитиш фабрикаси, шунингдек “Тошкент – Самарқанд” ва “Тошкент – Андижон” замонавий автомобиль йўллари қурилмоқда.

 

Ҳудудларда ҳам стратегик лойиҳалар амалга оширилмоқда. Хоразмда экологик авиаёқилғи мажмуаси, Сурхондарёда 940 гектарлик замонавий иссиқхона мажмуаси, Юқори Чирчиқда эса Янги Тошкент халқаро аэропорти бунёд этилмоқда.

 

Жорий йилда умумий қиймати 27 миллиард доллар бўлган 105 та янги саноат ва инфратузилма лойиҳасини бошлаш режалаштирилган.

 

Шунингдек, мамлакатнинг барча ҳудудларида жами 3 миллион нафар аҳоли учун янги массивлар барпо этилмоқда. Мазкур лойиҳаларда ўз маҳсулоти ва хизматлари билан иштирок этишни истаган маҳаллий тадбиркорларга хорижий инвесторлар билан тенг шароитлар яратиб берилади.

 

Транспорт-логистика соҳасида ҳам тадбиркорлар учун қўшимча имкониятлар кенгайтирилмоқда. Хусусан, юк автомобилларини импорт қилишда божхона божи ва утилизация йиғими бекор қилинди. Халқаро ташувлар учун вагон тақдим этишда қўшилган қиймат солиғи ставкасини ноль фоизга тушириш кўзда тутилмоқда.

 

Келгуси йилда Грузиянинг Поти портида йиллик қуввати 500 минг тонна бўлган логистика маркази ишга туширилади. Анаклия порти лойиҳаси бўйича ҳам амалий ишлар бошланади.

 

Бундан ташқари, Олот, Термиз, Янгийўл, Оҳангарон ва Хонобод шаҳарларида йирик транспорт-логистика марказлари ташкил этилади.

 

Келгуси йилда Тошкент халқаро молия маркази ҳамда “Enterprise Uzbekistan” халқаро рақамли технологиялар марказини ишга тушириш режалаштирилган.

 

Ушбу марказлар орқали мамлакатга 20–25 миллиард доллар миқдорида капитал, шунингдек янги билим, илғор технологиялар ва халқаро тажрибани жалб этиш учун қўшимча имкониятлар яратилади.