Ўзбекистонда кўп қаватли уйлар лифтлари учун янги талаблар белгиланди

 

Ўзбекистонда кўп қаватли уйлардаги лифтларни ишлатиш ва уларга техник хизмат кўрсатиш тартибига янги талаблар киритилди. Тегишли ўзгартиришлар Адлия вазирлиги томонидан давлат рўйхатидан ўтказилди. Янги қоидалар уч ой ўтиб кучга киради.

 

Унга кўра, кўп қаватли уйларни бошқариш органлари лифтларнинг бутун хизмат муддати давомида узлуксиз ва хавфсиз ишлашини таъминлаши шарт. Лифтлар фаолияти устидан диспетчерлик назорати ҳам йўлга қўйилади.

 

Шунингдек, лифт кабиналари оператор билан икки томонлама овозли алоқа имконини берувчи визуал ва овозли сигнализация билан жиҳозланиши керак. Шахта, машина хонаси ва блок эшикларининг очилиши ҳамда ёпилишини кўрсатувчи визуал сигнализация тизимлари ҳам бўлиши талаб этилади.

 

Ҳар бир лифт кабинасида унинг юк кўтариш қуввати ва йўловчиларнинг рухсат этилган сони, “Хавфсиз лифт” электрон платформасидаги рўйхатга олиш рақами, даврий техник кўрикдан ўтказилгани ҳақидаги маълумотлар ҳамда лифтга хизмат кўрсатувчи ташкилот ёки авария хизматининг телефон рақами кўрсатилиши лозим.

 

Ўзгартиришлар кўп қаватли уйларнинг умумий фойдаланиш жойларига оид айрим талабларни ҳам янгилайди. Жумладан, кириш йўлаклари ва зинапояларни ҳафтасига камида бир марта тозалаш талаби сақлаб қолинади, уларни ойига камида бир марта, жумладан деворларни тозалаш бўйича алоҳида талаб эса бекор қилинади.

 

Бундан ташқари, кўп қаватли уйларнинг кириш жойларига совутиш ва иситиш мосламалари, жумладан сплит тизимлар ўрнатиш тақиқланади. Балкон ва лоджияларнинг ички қисмига бундай қурилмаларни ўрнатишга эса бинонинг ташқи кўринишига зарар етказилмаган тақдирда рухсат берилади.