Андижонда 11 килограммдан ортиқ марихуана сотаётган шахс ушланди
У гиёҳвандлик моддасини интернет ва ижтимоий тармоқлар орқали ҳам сотишга уринган.
Андижон вилояти ИИБ Тезкор-қидирув хизмати ходимлари томонидан “Қора дори — 2026” кенг қамровли тезкор-профилактик тадбири доирасида Избоскан туманида тезкор тадбир ўтказилди.
Тадбир давомида 1989 йилда туғилган шахс туман ҳудудидаги қабристонлардан бирида соф оғирлиги 11 килограммдан ортиқ марихуанани 6 миллион сўм эвазига сотаётган вақтида ашёвий далиллар билан ушланган.
Дастлабки суриштирувларда гумонланувчи гиёҳвандлик моддасини фақат бевосита учрашувлар орқали эмас, балки интернет ва ижтимоий тармоқлардан фойдаланган ҳолда ҳам сотишга урингани аниқланган. Хусусан, у эҳтимолий харидорларга марихуана таклиф қилувчи видео хабарлар юбориб келган.
Мазкур ҳолат юзасидан Жиноят кодексининг 273-моддаси 6-қисми «а» банди билан жиноят иши қўзғатилган. Ҳозирда тергов ҳаракатлари олиб борилмоқда.
