Электр тармоқларидаги йўқотишларни камайтириш бўйича илмий тавсиялар ишлаб чиқилди
Олимлар Жиззахдаги подстанцияда тадқиқот ўтказди.
Фанлар академияси Энергетика муаммолари институти олимлари ва тадқиқотчилари Жиззах магистраль электр тармоқлари филиалининг 110/10 кВ кучланишли “Чилонзор” подстанциясида тадқиқот олиб борди. Ўзбекистон Фанлар академияси президенти матбуот котиби хабар берди.
Тадқиқот “Энергияни тежаш, ундан оқилона фойдаланиш ва энергия самарадорлигини ошириш тўғрисида”ги ЎРҚ-940-сон қонун талаблари асосида ташкил этилган.
Ўрганиш давомида электр тармоғидаги йўқотишлар даражаси, трансформаторларнинг юкланиш режими, реактив қувват баланси ҳамда изоляция ресурсининг эскириш кўрсаткичлари чуқур таҳлил қилинди.
Тадқиқот натижасида электр тармоғи самарадорлигини оширишга қаратилган бир қатор илмий асосланган тавсиялар ишлаб чиқилди. Хусусан, реактив қувватни компенсация қилувчи қурилмаларни ўрнатиш орқали қувват коэффициентини меъёрий даражага яқинлаштириш, SCADA тизими ёрдамида масофадан бошқариш ва электр тармоғини реал вақт режимида назорат қилиш имкониятларини жорий этиш таклиф қилинди.
Шунингдек, юклама графигини оптималлаштириш мақсадида истеъмол профилини рақамли моделлаштириш бўйича тавсиялар ишлаб чиқилган.
Мутахассисларнинг таъкидлашича, ушбу илмий ечимларни амалиётга жорий этиш техник йўқотишларни камайтириш, электр таъминоти ишончлилигини ошириш ҳамда мамлакат энергетика хавфсизлигини мустаҳкамлашга хизмат қилиши мумкин.
