Энди уй-жойни “рассрочка”га олиб бўлмайдими?
Адлия вазирлиги тарқалган хабарлар юзасидан расмий изоҳ берди.
Ижтимоий тармоқларда 2027 йилдан бошлаб уй-жойни «рассрочка»га олиб бўлмайди, деган хабарлар тарқалмоқда. Адлия вазирлиги тарқалган хабарлар юзасидан изоҳ берди.
Президентнинг 2026 йил 14 августдаги ПҚ–294-сон қарори билан 2027 йил 1 январдан муддатли тўлов хизматлари операторлари фаолияти тартибга солинади.
Қарорга кўра, муддатли тўлов хизматини кўрсатувчи юридик шахслар муддатли тўлов операторлари ҳисобланади. Бундай операторлар орқали кўчмас мулк муддатли тўлов хизматининг объекти бўла олмайди.
Яъни воситачи оператор орқали уй-жойни «рассрочка»га олиш имконияти бўлмайди.
Аммо бу қурувчи ўзи барпо этган уй-жойни харидорга бевосита бўлиб-бўлиб тўлаш шарти билан сота олмайди, дегани эмас.
Қарорда сотувчи томонидан истеъмолчига тўғридан-тўғри сотиш ҳолатлари муддатли тўлов хизмати тушунчасидан мустасно экани белгиланган.
Шундай қилиб, фуқаролар қурувчининг ўзидан уй-жойни бўлиб-бўлиб тўлаш шарти билан сотиб олишлари мумкин. Янги тартиб қурувчи ва харидор ўртасидаги бундай бевосита савдони тақиқламайди.
Шунингдек, 2027 йилдан муддатли тўлов операторлари махсус реестрга киритилади ва Марказий банк назорати остида фаолият юритади. Уларнинг шартномалари, устама ва комиссияларига нисбатан ҳам аниқ талаблар белгиланади.
