Европа денгизлари рекорд даражада исимоқда
Олимлар Европа атрофидаги денгизларда кузатилаётган ҳароратнинг асосий сабаби инсон фаолияти натижасидаги иқлим ўзгариши эканини маълум қилди.
2026 йил июль ойида Ўрта ер денгизининг ўртача ҳарорати 27 даражага етиб, июль ойлари учун тарихдаги энг юқори кўрсаткични қайд этган. Август бошида эса Испаниянинг Маллорса ороли яқинидаги очиқ денгизда сув ҳарорати 33 даражагача кўтарилган.
World Weather Attribution (WWA) гуруҳи таҳлилига кўра, инсон фаолияти билан боғлиқ иқлим ўзгариши Ўрта ер денгизидаги ҳароратни тахминан 2 даражага, Ғарбий Европа денгизларидаги ҳароратни эса 1,4 даражага оширган.
Олимлар Ўрта ер денгизининг шарқий ва ғарбий қисмлари, шунингдек, Бискай қўлтиғи ва Иберия қирғоқларида қайд этилган энг юқори ҳароратлар инсон сабаб бўлган глобал исишсиз деярли юзага келиши мумкин эмас эди, деган хулосага келган.
Денгиздаги иссиқлик тўлқинлари ҳам кенг ҳудудни қамраб олган. Таҳлилга кўра, ҳозир Бискай қўлтиғининг қарийб 90 фоизи ва Ғарбий Ўрта ер денгизининг 80 фоизи денгиздаги иссиқлик тўлқини шароитида қолмоқда. Глобал исиш бўлмаганида бу кўрсаткич тахминан 40 фоиз атрофида бўлиши кутиларди.
Мутахассислар бундай ҳарорат денгиз экотизимларига жиддий зарар етказиши мумкинлигини таъкидлаган. Иссиқлик айрим денгиз жониворларининг оммавий нобуд бўлишига, озиқ занжирларининг бузилишига ва айрим турларнинг салқинроқ ҳудудларга кўчишига сабаб бўлмоқда.
Бундан ташқари, иссиқ денгизлар қирғоқбўйи ҳудудларида намлик ва тунги ҳароратнинг ошишига, йилнинг кейинги даврларида эса кучлироқ бўронлар шаклланишига шароит яратиши мумкин.
