Кенияда туристлар бўлган вертолёт ҳалокати оқибатида 7 киши ҳалок бўлди
Полиция ҳисоботида ҳалок бўлган туристларнинг фуқаролиги кўрсатилмаган.
Кения шимолидаги Самбуру округида туристларни олиб кетаётган вертолёт ҳалокатга учради. Ҳодиса оқибатида учувчи ва олти нафар турист, жами етти киши ҳалок бўлган. Бу ҳақда Reuters Archers Post полиция бўлимининг дастлабки ҳисоботига таяниб хабар берди.
Дастлабки маълумотларга кўра, вертолёт Лоисаба қўриқхонасига учаётган вақтда ҳалокатга учраган. Ҳодиса Самбуру округидаги Маунт Ололокве тоғи яқинида содир бўлган.
Полиция ҳисоботида ҳалок бўлган туристларнинг фуқаролиги кўрсатилмаган.
Ҳашаматли саёҳатларни ташкил этувчи &Beyond компанияси ҳам ўз мижозларини олиб кетаётган вертолёт Маунт Ололокове яқинида ҳалокатга учраганини тасдиқлаган.
Компания баёнотида маҳаллий расмийлар ҳодисани тергов қилаётгани ва ҳалокат сабаби ҳозирча аниқланмагани қайд этилган.
