Рақобат қўмитаси мактаб бозорларида нархларни асоссиз оширмасликка чақирди
Қўмита савдо нуқталарида ўқув қуролларини ҳамёнбоп нархларда харид қилиш учун зарур шароитларни таъминлаш муҳимлигини билдирди.
Янги ўқув йилига тайёргарлик доирасида Ўзбекистон бўйлаб умумтаълим мактаблари, деҳқон бозорлари ва савдо комплексларида мавсумий “Мактаб бозорлари” ташкил этилган.
Рақобат қўмитаси ушбу савдо нуқталарида ўқув қуроллари, мактаб формаси, дарсликлар ва бошқа анжомларни сифатли ҳамда ҳамёнбоп нархларда харид қилиш учун зарур шароитларни таъминлаш муҳимлигини таъкидлади.
Қўмита тадбиркорларга сотилаётган маҳсулотларнинг сифати, нархларининг асослилиги ва истеъмолчиларга зарур маълумотларнинг тақдим этилиши бўйича қонунчилик талабларига риоя қилишни эслатди. Шунингдек, мактаб бозорлари иштирокчиларини нархларни асоссиз оширмасликка чақирди.
Фуқароларга эса харид вақтида маҳсулотнинг сифати, ишлаб чиқарувчиси, нархи ва бошқа муҳим маълумотларига эътибор қаратиш тавсия этилди.
Қўмита мактаб бозорларида нархлар барқарорлигини таъминлаш бўйича мониторинг олиб боришини маълум қилди.
Нархларнинг асоссиз оширилиши ёки бошқа қонунбузарлик ҳолатларига дуч келган фуқаролар 1159 қисқа рақамига мурожаат қилишлари мумкин.
