Россия украиналикларнинг ўз ҳукуматини танлаш ҳуқуқини белгиламаслиги керак — Федоров

 

Украинанинг собиқ мудофаа вазири Михайло Федоров мамлакатда уруш давом этаётганига қарамай, президентлик сайловларини ўтказиш имконини берадиган қонуний ва хавфсиз механизм ишлаб чиқишга чақирди. У бу ҳақда 19 август куни эълон қилган видеомурожаатида маълум қилган.

 

Федоровнинг таъкидлашича, Украина уруш яна бир неча йил давом этган тақдирда ҳам фуқароларнинг ўз ҳукуматини сайлаш ҳуқуқини таъминлаш йўлини топиши керак.

 

“Путинга украиналиклар қачон ўз ҳукуматини танлаши мумкинлигини ҳал қилишига йўл қўймаслигимиз керак”, — деган Федоров.

 

У сайловларни уруш шароитида ташкил этиш осон бўлмаслигини тан олган. Хусусан, фронтдаги ҳарбийлар, чет элда яшаётган миллионлаб украиналиклар ҳамда жанговар ҳаракатлар давом этаётган ҳудудларда яшовчи фуқароларнинг овоз бериш ҳуқуқини таъминлаш зарурлигини қайд этган. Бироқ унинг фикрича, бу муаммолар сайловларни ўтказишни имконсиз қилмайди.

 

Федоров демократия фақат тинчлик даврида амал қиладиган тамойил эмаслигини таъкидлаб, Украина айнан демократик ва эркин давлат бўлиб қолиш учун курашаётганини билдирган.

 

Унинг ушбу баёноти Владимир Зеленский Евгений Хмара номзодини Мудофаа вазири лавозимига илгари сурганидан бир неча соат ўтиб янграган. Бу эса Федоровнинг ҳукуматга қайтиш эҳтимолини камайтирган.

 

Маълумотларга кўра, Федоров 2026 йил январидан Мудофаа вазири лавозимида ишлаган. Июль ойида у лавозимидан озод этилган. Шундан сўнг Зеленский унга бошқа юқори давлат лавозимларини таклиф қилгани, бироқ Федоров Мудофаа вазирлигига қайтиш имконияти бўлмаса, уларни рад этгани айтилмоқда.

 

Федоровнинг истеъфоси ортидан Украинада унинг қайта лавозимга тайинланишини талаб қилган норозилик намойишлари ҳам бўлиб ўтган.