Россиялик бизнесменлар Украинага қарши уруш учун қарийб 4,5 миллиард доллар ажратди

 

Россиялик йирик бизнес вакиллари томонидан мамлакат федерал буджетига ўтказилган маблағлар 2026 йил август ўрталарига келиб 383,69 миллиард рублга, яъни 4,5 миллиард доллардан ортиқ суммага етган. Бу ҳақда Deutsche Welle Россиянинг “Электрон буджет” тизими маълумотларига таяниб хабар берди.

 

Қайд этилишича, 2026 йилнинг дастлабки етти ярим ойида буджетга тушган ушбу маблағлар 2025 йил давомида қайд этилган 251,3 миллиард рубллик тушумдан 1,5 баравар кўп.

 

Маълумотларга кўра, маблағлар Россия президенти Владимир Путин йирик бизнес вакилларини мамлакат буджетига “ихтиёрий бадаллар” киритишга чақирганидан кейин сезиларли даражада ошган.

 

Путин март ойида Россия бизнес вакиллари билан ёпиқ учрашув ўтказган. The Bell нашри манбаларига кўра, ушбу учрашувда тадбиркорларга буджетни қўллаб-қувватлаш таклиф қилинган. Ушбу ташаббуснинг келиб чиқишида «Роснефт» раҳбари Игор Сечин тургани айтилади.

 

Икки манбага кўра, тадбиркор Сулаймон Керимов учрашувнинг ўзида буджетга 100 миллиард рубль ўтказишга ваъда берган. Яна камида бир нафар бизнес вакили аниқ сумма кўрсатмаган ҳолда ташаббусни қўллаб-қувватлаган.

 

Статистикага кўра, март ойидаги учрашувгача нодавлат ташкилотлардан федерал буджетга атиги 15,6 миллиард рубль тушган. Апрель ойида эса тушум кескин ошиб, 159,7 миллиард рублга етган. Май ойида бу кўрсаткич 232,3 миллиард, июнда 294,4 миллиард рубль бўлган. Июль ва август ойининг биринчи ярмида эса маблағлар яна қарийб 30 фоизга ошиб, 383,69 миллиард рублни ташкил этган.

 

Шу тариқа, 2026 йилда Россия буджетига йирик бизнес ва нодавлат ташкилотлардан келиб тушган “ихтиёрий бадаллар” ҳажми ўтган йилги кўрсаткичдан сезиларли даражада ошган.