Тошкентда кредит қарзи сабаб машина хатланди
Маълум бўлишича, фуқаронинг банкдан 10 млн қарзи бўлган.
Фуқаролик ишлари бўйича Миробод туманлараро судининг 2025 йил 9 декабрдаги ижро ҳужжатига асосан, қарздор О.И.дан ундирувчи банк фойдасига 10 миллион 13 минг сўм миқдоридаги қарздорликни ундириш белгиланган.
Мазкур ижро ҳужжати Мажбурий ижро бюросининг Тошкент шаҳар бошқармаси иш юритувига келиб тушгач, унинг ижросини таъминлаш мақсадида қонунчиликда белгиланган тартибда зарур ижро ҳаракатлари амалга оширилди.
Ижро ҳаракатлари давомида қарздор О.И.га тегишли бўлган «HONGQI» русумли автотранспорт воситаси аниқланиб, белгиланган тартибда хатланди.
Ушбу чора қарздорликни ундириш, суд ҳужжатининг ижросини таъминлаш ҳамда ундирувчининг қонуний талабларини қаноатлантириш мақсадида амалга оширилди.
Таъкидлаш жоизки, суд ҳужжатларининг ўз вақтида ва тўлиқ ижро этилиши фуқаролар ҳамда юридик шахсларнинг қонуний ҳуқуқ ва манфаатларини таъминлашнинг муҳим кафолатларидан бири ҳисобланади. Шу боис қарздорларнинг ижро ҳужжатларида белгиланган мажбуриятларни ихтиёрий равишда бажариши энг мақбул ечимдир.
Қарздорлик ихтиёрий равишда бартараф этилмаган тақдирда, қонунчиликда назарда тутилган мажбурий ижро чоралари қўлланилиши мумкин.
