Ўзбекистон олийгоҳларида Қирғизистон, Қозоғистон, Тожикистон ва Мўғулистон фуқароларига 70 та грант ажратилди

 

2026/2027 ўқув йилида Ўзбекистон давлат олий таълим ташкилотларида Қозоғистон, Қирғизистон, Тожикистон ва Мўғулистон фуқаролари учун жами 70 та грант ўрни ажратилди. Бу ҳақда Олий таълим, фан ва инновациялар вазирлиги маълум қилди.

 

Шундан Қирғизистон, Қозоғистон ва Тожикистон фуқароларига 20 тадан, Мўғулистон фуқароларига эса 10 та грант ажратилган.

 

Қирғизистон фуқаролари учун 20 та грант 6 та бакалавриат йўналиши бўйича берилади. Улар орасида мактабгача таълим, компьютер инжиниринги, агрономия, қурилиш муҳандислиги, сув хўжалиги ва мелиорация ҳамда экология ва атроф-муҳит муҳофазаси йўналишлари бор.

 

Қозоғистон фуқаролари учун ажратилган 20 та грант математика, иқтисодиёт, тарих, бухгалтерия ҳисоби, компьютер инжиниринги, телекоммуникация технологиялари, логистика ва бошқа йўналишларни қамраб олади.

 

Тожикистон фуқаролари учун грантлар даволаш иши, стоматология, логистика, транспорт воситалари муҳандислиги, халқаро муносабатлар, юриспуденция, киберхавфсизлик, сунъий интеллект ва бошқа таълим йўналишлари бўйича тақсимланган.

 

Мўғулистон фуқаролари учун эса 10 та грант, жумладан 4 та бакалавриат ва 6 та магистратура ўрни ажратилган. Грантлар кончилик, ветеринария, қишлоқ хўжалиги, чорвачилик, транспорт-логистика ва халқаро савдо каби йўналишларни қамраб олади.