Ўзбекистон ва Туркия журналистлари ҳамкорликни кенгайтиради
Баликесирда ўтказилган халқаро медиафорум доирасида Ўзбекистон ва Туркия медиа ташкилотлари ўртасида ҳамкорлик меморандумлари имзоланди.
Туркиянинг тарихий шаҳарларидан бири — Баликесирда “Маданият йўналишидан рақамли келажакка: маданиятлар, медиа ва сунъий интеллект” мавзусида халқаро медиафорум бўлиб ўтди.
Форум доирасида Ўзбекистон Журналистлар уюшмаси ҳамда Туркиянинг медиа ташкилотлари вакиллари ўртасида икки мамлакат журналистикасининг бугунги ҳолати, замонавий медиа муҳитидаги янги имконият ва чақириқлар, профессионал алоқаларни кенгайтириш, тажриба алмашиш ҳамда қўшма медиа лойиҳаларни амалга ошириш масалаларига бағишланган учрашувлар ташкил этилди.
Мулоқотларнинг муҳим натижаларидан бири Ўзбекистон ва Туркия медиа тузилмалари ўртасида ҳамкорлик меморандумининг имзоланганидир.
Ўзбекистон журналистлар уюшмаси бошқаруви раиси Шуҳрат Орипов, Туркия журналистлар федерацияси раиси Йилмаз Каража ва Туркия Интернет Медиа Бирлиги бошқаруви раиси Сулаймон Баса томонидан имзоланган ҳужжатлар икки мамлакат журналистлари ва медиа ташкилотлари ўртасидаги ҳамкорликни тизимли ва амалий асосда ривожлантириш учун муҳим қадам бўлди.
Хусусан, Туркия Журналистлар федерацияси билан ҳамкорлик доирасида журналистлар делегациялари алмашинуви, маҳаллий матбуотни ривожлантириш бўйича тажриба ўрганиш, рақамли журналистика, сунъий интеллект ва медиа саводхонлик йўналишларида қўшма семинар ва тренинглар ташкил этиш, журналистларнинг малакасини ошириш ҳамда халқаро медиафорумлар ўтказиш режалаштирилган.
Шунингдек, икки мамлакат журналистлари ўртасидаги профессионал тармоқни кенгайтириш ва ўзаро тажриба алмашиш ҳам ҳамкорликнинг устувор йўналишларидан бири этиб белгиланди.
Туркия Журналистлар федерацияси 1996 йилда ташкил этилган бўлиб, журналистларнинг касбий манфаатларини ҳимоя қилиш, матбуот ва сўз эркинлиги масалаларида журналистик ҳамжамиятнинг умумий позициясини ифодалаш, маҳаллий ва минтақавий матбуотни қўллаб-қувватлаш ҳамда профессионал ҳамкорликни ривожлантириш йўналишларида фаолият юритади. Федерация Туркиянинг 81 вилоятидаги журналистлар уюшмаларини бирлаштиради.
ТİМБİР билан имзоланган меморандум эса ҳамкорликнинг рақамли медиа йўналишини янада кенгайтиришга қаратилган. Ташкилот интернет журналистикаси, рақамли медиа ва онлайн ахборот платформалари йўналишида фаолият юритади. Унинг ҳамкорлик тармоғи Туркиянинг 81 вилояти ҳамда дунёнинг 25 мамлакатини қамраб олади. Ташкилот тармоғига 800 дан ортиқ медиа ташкилоти ва 1000 дан зиёд ахборот платформаси киради.
Ўзбекистон Журналистлар уюшмаси ва ТİМБİР ўртасидаги ҳамкорлик доирасида рақамли журналистика, интернет медиа, журналистлар малакасини ошириш, медиа саводхонлик, дезинформацияга қарши курашиш ва ёш журналистларни қўллаб-қувватлаш бўйича қўшма лойиҳаларни амалга ошириш кўзда тутилмоқда.
Шунингдек, медиа ходимлари учун таълим дастурлари, семинар ва тренинглар ташкил этиш, рақамли муҳитда ахборотнинг ишончлилигини таъминлаш, журналистик этика ҳамда замонавий медиа технологияларидан фойдаланиш бўйича тажриба алмашиш масалаларига ҳам алоҳида эътибор қаратилади.
Баликесирда имзоланган мазкур келишувлар Ўзбекистон ва Туркия журналистлари ўртасидаги профессионал алоқаларни янги босқичга олиб чиқиш, тажриба алмашиш имкониятларини кенгайтириш ва қўшма медиа лойиҳаларни ривожлантириш йўлидаги муҳим қадам бўлди.
