Доимий яшаш жойига эга бўлмаган шахслар учун вақтинча бошпана билан таъминлаш тартиби белгиланди

 

Ўзбекистонда муайян яшаш жойига эга бўлмаган шахсларни вақтинча бошпана ва зарур ижтимоий хизматлар билан таъминлашнинг ягона тартиби белгиланди. Тегишли тартиб Вазирлар Маҳкамасининг 18 августдаги қарори билан тасдиқланган маъмурий регламентда назарда тутилган.

 

Унга кўра, бундай шахслар Вақтинча бошпана ва ижтимоий мослашув марказларига жойлаштирилади. Марказларга фуқароларнинг ўзи мурожаат қилиши, шунингдек, маҳалла, ички ишлар органлари ёки бошқа ваколатли ташкилотлар томонидан аниқланган шахслар ҳақида маълумот тақдим этилиши мумкин.

 

Марказларда шахсларга вақтинча бошпана ва зарур маиший шароитлар яратилади. Шунингдек, улар тиббий кўрикдан ўтказилади, зарурат бўлганда даволанишга йўналтирилади ҳамда пенсия, нафақа ва бошқа ижтимоий тўловларни расмийлаштиришда кўмак кўрсатилади.

 

Бундан ташқари, паспорт ёки ID-карта каби ҳужжатларни тиклаш, қариндошларини аниқлаш, ишга жойлашиш ва айрим ҳолларда уй-жой масаласини ҳал этишга кўмаклашиш ҳам назарда тутилган.

 

Шахс марказга жойлаштирилгач, унинг маълумотлари тегишли ахборот тизимларига киритилади. Ижтимоий хизматлар маркази ходимлари томонидан унинг ҳолати ўрганилиб, зарур ёрдам чораларини белгиловчи индивидуал ижтимоий мослашув режаси ишлаб чиқилади.

 

Қарорга мувофиқ, шахс дастлаб марказга 20 кунгача муддатга жойлаштирилиши мумкин. Зарурат бўлганда, унинг марказда қолиш муддати қонунчиликда белгиланган тартибда узайтирилади.

 

Шунингдек, ижтимоий мослаштириш жараёнини мониторинг қилиш, амалга оширилган ишлар бўйича маълумотларни шакллантириш ҳамда масъул ходимларнинг жавобгарлигини белгилаш механизмлари жорий этилади.

 

Мазкур тартиб муайян яшаш жойига эга бўлмаган шахсларни аниқлашдан бошлаб, уларни вақтинча бошпана билан таъминлаш, зарур тиббий ва ижтимоий хизматлар кўрсатиш ҳамда мустақил ҳаётга қайтишига кўмаклашиш жараёнларини ягона тизим асосида ташкил этишга қаратилган.