Марказий Африкада олтин конининг қулаши оқибатида 100 дан ортиқ киши ҳалок бўлди
Кўплаб кончилар бедарак йўқолган ёки вайроналар остида қолган.
Марказий Африка Республикасининг ғарбий қисмида, Камерун билан чегарадош ҳудудда жойлашган ҳунармандчилик олтин конининг қулаши оқибатида 100 дан ортиқ киши ҳалок бўлди.
Маҳаллий ОАВ хабарларига кўра, фожиа 19 август куни маҳаллий вақт билан соат 14:00 атрофида Бабуа шаҳридан қарийб 50 километр узоқликдаги Замбое қишлоғида содир бўлган.
Қутқарув ишлари давомида 100 дан ортиқ жасад топилган. Маҳаллий ОАВларнинг айримлари ҳалок бўлганлар сони 107 нафарга етгани ҳақида хабар берган.
Маҳаллий расмийлар ва қутқарувчиларнинг маълумотларига кўра, кўплаб кончилар ҳамон бедарак йўқолган ёки вайроналар остида қолган. Шу сабабли қурбонлар сони янада ортиши мумкин.
Дастлабки маълумотларга кўра, ҳодиса кончилар ишлаётган бир нечта ерости туннелларининг қулаб тушиши натижасида юз берган бўлиши мумкин. Воқеа сабабларини аниқлаш учун тергов бошланган.
Қутқарув ва қидирув ишлари давом этмоқда. Маҳаллий расмийлар ташкилотлар ҳамда кўнгиллилардан қутқарув ишларида ёрдам сўраган.
Марказий Африка Республикасида ҳунармандчилик олтин конларида бундай бахтсиз ҳодисалар тез-тез учрайди. Минглаб одамлар кичик миқёсдаги кончилик ишларида, кўпинча давлат назоратисиз фаолият юритади.
