Қозоғистонда хавфли иситма: касалланганлар орасида ўзбекистонликлар ҳам бор
Туркистон вилоятида каналар чақиши оқибатида хавфли иситма қайд этилмоқда.
Қозоғистоннинг Туркистон вилоятида йил бошидан буён Қрим-Конго геморрагик иситмасининг 8 та ҳолати қайд этилди. Касалланганлар орасида қовун далаларида ишлаш ёки дам олиш вақтида кана чаққан Ўзбекистон фуқаролари ҳам бор.
Бу ҳақда Туркистон вилояти Санитария-эпидемиологик назорат бошқармаси раҳбари Нурбек Нишанов «Otyrar» нашрига берган интервьюсида маълум қилган.
Мутахассиснинг сўзларига кўра, қайд этилган 8 та ҳолатнинг 6 таси чорва молларига қараш ёки улар билан алоқада бўлиш, яна бир ҳолат эса ҳовлида ўт ўриш вақтида кана чақиши билан боғлиқ.
Йил бошидан буён ҳудудда 35 мингдан ортиқ намуна текширилган ва 55 та канада Қрим-Конго геморрагик иситмаси қўзғатувчиси аниқланган.
Туркистон вилояти мазкур инфекция бўйича эндемик ҳудуд ҳисобланади. Касаллик, одатда, баҳор ва ёз ойларида каналар фаоллиги ошиши билан кўпроқ учрайди.
Мутахассислар чорва моллари билан ишлашда ёки табиат қўйнида бўлганда ҳимоя кийимларидан фойдаланиш, танани мунтазам равишда кана бор-йўқлигига текшириш ва кана чаққан ҳолатда тиббий ёрдамга мурожаат қилишни тавсия этмоқда.
