Португалияда “бурқа қонуни” кучга кирди
Мамлакатда жамоат жойларида юзни ёпиб юриш тақиқланди.
Португалия президенти Антонио Жосе Сегуро жамоат жойларида юзни яширишга қаратилган кийимларни тақиқловчи қонунни имзолади. Бу ҳақда European Pravda нашри Euractiv маълумотларига таяниб хабар берди.
Маҳаллий ОАВ томонидан “бурқа қонуни” деб аталган ҳужжат июль ойида парламент томонидан ўнг қанот ҳукмрон коалицияси ва ўта ўнг қанот вакилларининг қўллаб-қувватлаши билан маъқулланган. Чап қанот партиялари эса қонунга қарши овоз берган.
Қонунга кўра, жамоат жойларида юзни яшириш ёки шахсни аниқлашга тўсқинлик қилувчи кийимлардан фойдаланиш тақиқланади. Шунингдек, шахсни жинси, дини, ёши ёки келиб чиқишига боғлиқ сабабларга кўра юзини ёпишга мажбурлаш ҳам тақиқланган.
Президент Сегуро юз инсоннинг шахсияти ва мулоқотининг муҳим қисми эканини таъкидлаган. Шу билан бирга, у мазкур масала ижтимоий ва маданий жиҳатдан нозик эканини қайд этган.
Қоидани бузганлар 150 евродан 3 минг еврогача жаримага тортилиши мумкин.
Қонунда айрим истиснолар ҳам назарда тутилган. Жумладан, тиббий, касбий, бадиий ёки об-ҳаво билан боғлиқ заруратлар, шунингдек, диний ибодат жойлари, дипломатик ваколатхоналар ва самолёт бортидаги ҳолатлар бундан мустасно.
