Россияда ўзбекистонлик ҳайдовчи 5 йилга қамалди
18 ёшли такси ҳайдовчиси йўловчини бейсбол таёқчаси билан уриб, оғир тан жароҳати етказган.
Россиянинг Владивосток шаҳрида йўловчини бейсбол таёқчаси билан уриб, унга оғир тан жароҳати етказган Ўзбекистон фуқаросига суд ҳукми ўқилди. Бу ҳақда “Главне Новости” хабар берди.
Маълум қилинишича, воқеа 2025 йил ноябрь ойида содир бўлган. 18 ёшли Ўзбекистон фуқароси такси ҳайдовчиси бўлиб ишлаган. У йўловчи билан жанжаллашиб қолганидан сўнг автомобиль юкхонасидан бейсбол таёқчасини олиб, эркакнинг бош қисмига камида уч марта зарба берган.
Оқибатда жабрланувчи оғир тан жароҳатлари, жумладан, очиқ бош мия жароҳатини олган ва шифохонага ётқизилган.
Ҳодисадан кейин ҳайдовчи Приморе ўлкасидан қочиб кетган. Ҳуқуқни муҳофаза қилувчи органлар уни Кемерово вилоятида қўлга олиб, Владивостокка қайтарган.
Суд Ўзбекистон фуқаросини қасддан оғир тан жароҳати етказишда айбдор деб топиб, умумий тартибли колонияда 5 йил муддатга озодликдан маҳрум қилиш жазосини тайинлаган.
Шунингдек, судланувчи жабрланувчига етказилган маънавий зарар учун 1 миллион рубль миқдорида товон пули тўлаши белгиланган.
