Тадбиркорларга қўлланадиган жарималар ўртача 2 баробарга камайтирилади
Бу ўзгариш бизнесга тушадиган маъмурий босимни камайтириш ва назоратни профилактикага йўналтиришга хизмат қилади.
Президент Шавкат Мирзиёевнинг Хоразмда тадбиркорлар билан ўтказилган VI очиқ мулоқотида бизнесга нисбатан маъмурий босимни камайтиришга қаратилган янги ёндашувлар маълум қилинди.
Бизнес-омбудсман маълумотига кўра, ҳозирда 51 та идора молиявий жарима қўллаш ваколатига эга. Жариманинг бир қисми уни қўллаган идорага тушиши айрим раҳбарларда назоратни тадбиркорлар фаолиятини текшириш ва жарима ундиришга йўналтириш хавфини юзага келтираётгани танқид қилинди.
Шу муносабат билан тадбиркорларга қўлланадиган барча турдаги жарималар миқдорини ўртача 2 баробарга камайтириш таклиф қилинди.
Янги ёндашувда жариманинг асосий вазифаси маблағ йиғиш эмас, балки соҳада қонуний тартиб ва интизомни таъминлаш ҳамда ҳуқуқбузарликларнинг олдини олишдан иборат бўлиши кўзда тутилмоқда.
Президент назорат идоралари фаолиятида тартиб-интизом ва профилактикага устувор аҳамият бериш зарурлигини таъкидлади. Яъни, тадбиркорни жазолашдан кўра, қоидабузарликларнинг олдини олиш ва қонуний фаолият юритиши учун шароит яратишга эътибор қаратилади.
Шунингдек, очиқ мулоқотда молиявий жарима қўллаш ваколатига эга идоралар фаолиятида маъмурий босимни камайтириш зарурлиги қайд этилди. Тадбиркорлик субъекти ҳуқуқлари бузилган ёки асоссиз жарима қўлланган деб ҳисобласа, Бизнес-омбудсманга мурожаат қилиши мумкин.
