Тошкент ва Фарғонада “Умра”га юборишни ваъда қилганлар ушланди
Тегишли лицензияси бўлмаган шахс 3 кишини “Умра”га юбориш эвазига 3 450 доллар, яна бир шахс 4 кишини юбориш учун 4 200 доллар талаб қилган.
Тошкент шаҳри ва Фарғона шаҳрида фуқароларни «Умра» зиёратига юбориш билан боғлиқ ноқонуний ҳолатлар аниқланди. Бу ҳақда ДХХ маълум қилди.
Тошкент шаҳрида яшовчи, 1981 йилда туғилган фуқаро тегишли лицензияга эга бўлмаган ҳолда, ўзини «Умра» зиёратини ташкил этишга рухсат берилган туристик фирманинг вакили сифатида таништириб, 3 нафар фуқарони Саудия Арабистонига «Умра» сафарига юбориш ҳамда зиёрат амалларини тўлиқ бажаришларини таъминлаш эвазига 3 450 АҚШ доллари талаб қилган.
Давлат хавфсизлик хизмати, Иқтисодий жиноятларга қарши курашиш департаменти ва Ички ишлар органлари ходимлари ҳамкорлигида ўтказилган тезкор тадбирда мазкур шахс 3 400 АҚШ доллари ва 600 минг сўмни олаётган вақтида ашёвий далиллар билан ушланган.
Фарғона шаҳрида аниқланган бошқа ҳолатда эса 1998 йилда туғилган фуқаро танишлари орқали 4 нафар фуқарони «Умра» зиёратига юборишни ваъда қилиб, бунинг эвазига жами 4 200 АҚШ доллари талаб қилган. Сўралган пул маблағларини олаётган вақтида унинг ноқонуний фаолиятига ДХХ ва ИИБ ходимлари томонидан чек қўйилган.
Мазкур ҳолатлар юзасидан ҳар икки шахсга нисбатан жиноят ишлари қўзғатилиб, айни пайтда тергов ҳаракатлари олиб борилмоқда.
