Тошкентда “Яшил тўлқин”нинг янги қисми ишга туширилди

 

Тошкент шаҳридаги Амир Темур майдони ва унга туташ кўчаларда транспорт ҳаракатини мувофиқлаштиришга қаратилган “Яшил тўлқин” светофор тизимининг янги қисми ишга туширилди.

 

Марказий йўл ҳаракатини бошқариш маркази маълумотига кўра, ҳудуддаги 5 та светофор ягона алгоритм асосида синхронлаштирилган. Тизим икки йўналиш бўйича ҳаракатни мувофиқлаштириб, транспорт воситаларининг ортиқча тўхташларини камайтиришга хизмат қилади.

 

Эндиликда ҳайдовчи белгиланган тезлик режимига риоя қилган ҳолда яшил чироқда ҳаракатни бошласа, Амир Темур майдонидаги айланма йўл бўйлаб кейинги светофорларга яшил сигнал вақтида етиб бориши мумкин.

 

Тизим, хусусан, Амир Темур ва Бухоро кўчалари кесишмасидан Амир Темур кўчаси бўйлаб Олой бозори йўналишида, шунингдек, тескари йўналишда ҳаракатланишни мувофиқлаштиради.

 

“Яшил тўлқин”нинг ишлаш принципи светофорларнинг барчаси бир вақтда яшил чироқ ёқишига эмас, балки транспорт воситасининг белгиланган масофани босиб ўтиш вақтини ҳисобга олган ҳолда светофор сигналларини кетма-кет мувофиқлаштиришга асосланган.

 

Тизимдан самарали фойдаланиш учун ҳайдовчиларга:

• ҳаракатни яшил сигналда бошлаш;

• белгиланган тезликни сақлаш;

• кескин тезлашиш ва тормозлашдан сақланиш;

• хавфсиз масофани сақлаш;

• светофор сигналларига қатъий риоя қилиш тавсия этилади.

 

“Яшил тўлқин” тезликни ошириш учун эмас, балки транспорт оқимини бир маромда ва хавфсиз ташкил этиш учун жорий этилган.

 

Янги тизим натижасида светофорлар олдидаги ортиқча тўхташлар, тирбандлик ва кутиш вақтини камайтириш, транспорт ҳаракатини силлиқлаштириш, шунингдек, ёқилғи сарфи ва зарарли чиқиндиларни қисқартириш кутилмоқда.

 

Айни пайтда Амир Темур айланма йўли ва Маҳтумқули кўчаси ўртасидаги йўналишни “Яшил тўлқин” тизимига улаш алгоритми ишлаб чиқилмоқда.