Ўзбекистон иккинчи АЭС қуришга тайёргарлик кўрмоқда
Президент электр энергиясини кафолатли етказиб бериш ва унинг таннархини камайтириш зарурлигини таъкидлади.
Ўзбекистонда иккинчи атом электр станциясини қуриш лойиҳаси бўйича катта тайёргарлик ишлари олиб борилмоқда. Бу ҳақда Президент Шавкат Мирзиёев 17 август куни Хоразм вилоятида янги инвестиция лойиҳаларини ишга тушириш маросимида маълум қилди.
Давлат раҳбари Жиззах вилоятида атом электр станцияси қурилаётганини таъкидлаб, Ўзбекистонда иккинчи атом электр станцияси бўйича ҳам катта тайёргарлик кўрилаётганини билдирган.
Президент электр энергияси билан кафолатли таъминлаш ва унинг таннархини камайтириш мамлакатнинг 2030 йилгача мўлжалланган ривожланиш стратегиясини амалга оширишдаги муҳим вазифалардан эканини қайд этган.
“Яқинда иккинчи станция бўйича ҳам катта тайёргарлик қиляпмиз”, — деган Шавкат Мирзиёев.
Давлат раҳбари инвестицияларни жалб қилиш, электр энергиясини кафолатли етказиб бериш ҳамда унинг таннархини пасайтириш бўйича зарур чораларни кўриш лозимлигини таъкидлаган.
