АҚШ Эронга қарши “тарихдаги энг қаттиқ санкциялар”ни жорий этишини маълум қилди
Санкциялар тафсилотлари келаси ҳафта эълон қилинади.
АҚШ Молия вазири Скотт Бессент Қўшма Штатлар Эронга қарши «тарихдаги энг қаттиқ санкциялар»ни жорий этишини маълум қилди. Бу ҳақда Reuters хабар берди.
Бессентнинг айтишича, янги чоралар Эронга нисбатан кенг кўламли ҳарбий операцияларга эҳтиёжни камайтиришга қаратилган. Вазир санкцияларнинг тафсилотлари келаси ҳафта эълон қилинишини билдирган.
Унинг таъкидлашича, АҚШ Эронга нисбатан иқтисодий босимни кучайтириш билан бирга блокадани ҳам қўлламоқда. Бессент иттифоқчилар ва бошқа давлатларни ҳам бу борада қарор қабул қилишга чақирган.
АҚШ Молия вазиридан Хитойнинг Эрон билан бизнес алоқалари сабаб Пекинга қарши чоралар кўрилиши мумкинлиги ҳақида сўралган. Бессент бу масаладаги кўплаб музокараларни шахсий тартибда олиб бориш маъқул эканини айтган.
Бессентнинг баёноти АҚШ президенти Доналд Трамп Эронни изоляция қилишга қаратилган кенг кўламли иқтисодий операция бошланганини маълум қилганидан кейин янграган.
