Дори, сигарет, телефон ва қурилиш буюмлари: қалбаки ҳужжатлар асосидаги юк ушланди
Ҳолат юзасидан уч нафар шахсга нисбатан жиноят иши қўзғатилди.
Давлат хавфсизлик хизмати ва Божхона қўмитаси ходимлари ҳамкорлигида ўтказилган тезкор-қидирув тадбири давомида мамлакат ҳудудига қалбаки божхона ҳужжатлари асосида ноқонуний олиб кирилган товар-моддий бойликлар аниқланди. Бу ҳақда ДХХ хабар берди.
Тадбир давомида Бухоро вилояти Ғиждувон туманида яшовчи, 2001 йилда туғилган фуқаро бошқарувидаги юк автотранспорт воситаси Тошкент шаҳри Чилонзор туманидаги божхона омборида холислар иштирокида кўздан кечирилган.
Текширув натижасида транзит декларацияси ва йўл кузатув ҳужжатларида кўрсатилмаган 2 490 дона тиббий буюм, 13 794 қути дори воситаси, 880 дона биологик фаол қўшимча, 273 370 қути сигарет ва тамаки маҳсулоти, 3 131 дона электрон сигарета, 8 591 дона уяли телефон, 19 дона планшет, 52 дона парфюмерия маҳсулоти борлиги аниқланган.
Шунингдек, ҳужжатларда кўрсатилган миқдори ва бошқа хусусиятлари амалдаги ҳолатига мос келмаган 72 501 дона қурилиш асбоб-ускунаси ҳам аниқланган.
Дастлабки маълумотларга кўра, автотранспорт воситаси эгаси Тошкент шаҳрида яшовчи 1978 ва 1995 йилларда туғилган икки нафар фуқаро билан тил бириктириб, мазкур товарларни қалбаки божхона ҳужжатлари асосида қўшни давлатдан Ўзбекистонга олиб кирган.
Ҳолат юзасидан мазкур шахсларга нисбатан Жиноят кодексининг 182-моддаси 2-қисми «а» банди билан жиноят иши қўзғатилган. Ҳозирда тергов ҳаракатлари олиб борилмоқда.
