Қирғизистонда Telegram ва бошқа хорижий сервислар блокланиши мумкин

 

Қирғизистон Давлат солиқ хизмати мамлакат резидентларига электрон хизматлар кўрсатувчи, бироқ мажбурий солиқ рўйхатидан ўтмаган хорижий компанияларга нисбатан чекловлар қўлланиши мумкинлигини маълум қилди.

 

Солиқ хизматига кўра, Қирғизистон резидентларига электрон хизматлар кўрсатувчи хорижий ташкилотлар солиқ органида мажбурий рўйхатдан ўтиши ва тегишли солиқ мажбуриятларини бажариши керак.

 

Электрон хизматлар қаторига дастурий таъминот, онлайн ўйинлар, интернет-реклама, хостинг, маълумотларни сақлаш, рақамли контентдан фойдаланиш имконини бериш ва бошқа шу каби хизматлар киради.

 

Ҳозирга қадар 73 та хорижий компания солиқ рўйхатидан ўтган. Шу билан бирга, Қирғизистон резидентларидан катта миқдорда даромад олаётган, бироқ мажбурий рўйхатдан ўтмаган хорижий компаниялар ҳам аниқланган.

 

Давлат солиқ хизмати тижорат банклари билан ҳамкорликда пул ўтказмалари бўйича маълумотларни таҳлил қилиб, катта молиявий айланмага эга 11 та хорижий компанияни аниқлаган. Улар орасида Alibaba Group Holding Limited (1688), Pinduoduo, Twitch, Microsoft, Valve, Sony Interactive Entertainment, Epic Games, Electronic Arts, VK, Telegram ва Dropbox бор.

 

2024–2025 йиллар давомида ушбу компанияларга Қирғизистон резидентларидан 15,9 миллионга яқин пул ўтказмаси амалга оширилган. Уларнинг умумий қиймати 13,2 миллиард сўмдан ошган.

 

Энг катта пул оқими Shanghai Xunmeng Information Technology Co., Ltd. (Pinduoduo) — 8,89 миллиард сўм, Alibaba Group Holding Limited (1688) — 2,83 миллиард сўм ва Microsoft — 1,01 миллиард сўм ҳиссасига тўғри келган.

 

Давлат солиқ хизмати мазкур компанияларга солиқ рўйхатидан ўтиш ва солиқ мажбуриятларини бажариш тартибини тушунтирувчи расмий хатлар юборган. Шунингдек, тегишли мурожаатлар дипломатик каналлар орқали Қирғизистон Ташқи ишлар вазирлиги орқали ҳам юборилган.

 

Бироқ солиқ хизматининг маълумотларига кўра, ҳозиргача компаниялардан жавоб олинмаган ва улар солиқ органларида рўйхатдан ўтмасдан фаолиятини давом эттирмоқда.

 

Солиқ мажбуриятларини бажармаслик давом этса, ваколатли органларга мазкур компанияларнинг Қирғизистон ҳудудидаги электрон хизматларига киришни чеклаш бўйича сўров юборилиши мумкин.