Испанияда жазирама туфайли ўлимлар сони 4,5 мингга яқинлашди
Бу кўрсаткич 2022 йилдан бери энг юқори натижа ҳисобланади.
Испанияда 1 июндан 19 августгача бўлган даврда иссиқ об-ҳаво билан боғлиқ қарийб 4,5 мингта ўлим қайд этилган. Бу ҳақда мамлакатдаги кундалик ўлим ҳолатларини мониторинг қилиш тизими маълумотлари асосида ТАСС хабар берди.
Қайд этилишича, мазкур кўрсаткич 2022 йилдан бери энг юқори натижа ҳисобланади. 2025 йилнинг мос даврида эса бу кўрсаткич қарийб 3 100 тани ташкил этган.
Испания метеорологлари маълумотларига кўра, 2026 йилнинг биринчи ярми мамлакатда сўнгги 65 йилдаги энг иссиқ давр бўлган.
Шунингдек, 2026 йил июни Испания тарихидаги ёз мавсумининг иккинчи энг иссиқ бошланиши сифатида қайд этилган. Июль ойи эса 1961 йилда бошланган метеорологик кузатувлар тарихидаги энг иссиқ ва энг қуруқ июль бўлган.
