Перуда 7,2 магнитудали зилзила содир бўлди
Ҳозирча жабрланганлар ҳақида маълумот берилмаган.
Перунинг Аякучо минтақасида 7,2 магнитудали зилзила қайд этилди. Перу Миллий сейсмология маркази маълумотига кўра, зилзила маҳаллий вақт билан соат 13:00 да содир бўлган. Эпицентр Коракора шаҳридан 35 километр шимолда, 108 километр чуқурликда жойлашган.
Германия Геология фанлари тадқиқот маркази зилзила магнитудасини 6,6, Европа-Ўрта ер денгизи сейсмология маркази ва АҚШ Геологик хизмати эса 6,7 деб баҳолаган. Перу Геофизика институти эса магнитудани 7,2 деб қайд этган.
Зилзила мамлакатнинг бир қатор ҳудудларида, жумладан, Лима шаҳрида ҳам сезилган. Коракорада эвакуация вақтида икки киши жароҳатланган. Дастлабки маълумотларга кўра, 22 та уй, 6 та тиббиёт муассасаси ва 1 та мактаб зарар кўрган. Шунингдек, ҳудудда тош қулаши кузатилган. Ҳозирча жабрланганлар ҳақида аниқ маълумот берилмаган.
Зилзиладан сўнг цунами хавфи эълон қилинмаган.
Эслатиб ўтамиз, аввалроқ Индонезияда 7,7 магнитудали зилзила содир бўлган эди.
