Саида Мирзиёева Бухородаги лойиҳалар ижроси билан танишди
Ташриф давомида сув тежаш, мактабгача таълим ва туризм лойиҳалари муҳокама қилинди.
Бухоро вилоятига ташриф давомида Саида Мирзиёева май ойида белгиланган режалар ижроси ва амалга оширилган ишлар натижаларини кўздан кечирди.
Ташриф давомида «Жўйзар» каналининг 9 километрлик қисми бетонлаштирилгани қайд этилди. Яна 10 километрлик қисмида ушбу ишлар давом этмоқда. Канални бетонлаштириш натижасида йилига 12 миллион куб метр сувни тежаш имконияти яратилади. Шу ҳудудда балиқчилик хўжалиги ҳам ишга туширилган.
Шунингдек, «Шайхонча» маҳалласида 240 ўринли замонавий мактабгача таълим ташкилоти барпо этилгани билан танишилди.
Саида Мирзиёева ташриф давомида туризм соҳасидаги янги лойиҳаларни ҳам кўздан кечирди. Жумладан, «Афшона» мажмуаси, этно-уйлар, “Жўйи Мулиён” каналини тиклаш, янги аэропорт яқинидаги меҳмонхоналар ва туризм кластери билан боғлиқ масалалар муҳокама қилинди.
Бухорога йилига 10 миллион сайёҳни жалб этиш, вилоятни транзит ҳудуддан замонавий ва тўлақонли туризм масканига айлантириш асосий мақсадлардан бири экани таъкидланди.
Ташриф якунида Саида Мирзиёева Бухоронинг “Етти пир” қадамжоларини зиёрат қилди.
