Нурафшонда Ёшлар ишлари бўлими раҳбари сўкингани учун ишдан бўшатилди
Ижтимоий тармоқларда Нурафшон шаҳар Ёшлар ишлари бўлими раҳбарининг маҳалла ёшлар етакчиларига қўпол ва ҳақоратомуз муносабатини акс эттирувчи аудиоёзув тарқалган эди.
Нурафшон шаҳар Ёшлар ишлари бўлими раҳбари Миркарим Мирмаҳмудовичнинг маҳалла ёшлар етакчиларига нисбатан қўпол ва ҳақоратомуз муносабатда бўлгани акс этган аудиоёзув ижтимоий тармоқларда тарқалиб, муҳокамаларга сабаб бўлди.
Мазкур ҳолат юзасидан Ёшлар ишлари агентлиги Тошкент вилояти бошқармаси ва Нурафшон шаҳар ҳокимлиги томонидан хизмат текшируви ўтказилди.
Ўрганиш давомида ижтимоий тармоқларда тарқалган аудиоёзувдаги ҳолатлар ўз тасдиғини топгани аниқланган. Хусусан, 2026 йил 18 август куни М. Мирмаҳмудович маҳалла ёшлар етакчилари иштирокидаги йиғилишда хизмат одоби ва касбий этика талабларини қўпол равишда бузиб, уларга кескин ҳамда ҳақоратомуз муносабатда бўлган.
Хизмат текшируви давомида унинг иш фаолиятида қатор бошқа камчиликлар ҳам аниқланган.
Ҳолат юзасидан М. Мирмаҳмудович билан суҳбат ўтказилиб, аниқланган камчиликлар ва уларнинг салбий оқибатлари тушунтирилган. У ўзининг қўпол хатти-ҳаракатларини тан олган ҳамда ўзи билан тузилган меҳнат шартномасини бекор қилишини билдирган.
Натижада, М. Мирмаҳмудович билан тузилган меҳнат шартномаси бекор қилинган. Унинг иш фаолиятида аниқланган бошқа камчиликлар юзасидан текширувлар давом эттирилмоқда ва натижаларига кўра тегишли чоралар кўрилиши таъминланади.
