Тошкентда дизайн-кодни жорий этиш ёндашуви қайта кўриб чиқилди

 

Тошкент шаҳар ҳокимлиги пойтахтда дизайн-кодни жорий этиш жараёнига билдирилган фикр-мулоҳазалар, жумладан, тадбиркорларнинг танқидий таклифлари асосида ёндашув қайта кўриб чиқилганини маълум қилди.

 

Ҳокимликнинг қайд этишича, бундан буён асосий эътибор очиқ мулоқот, талабларни тушунарли тарзда етказиш ва тадбиркорлар билан юзага келаётган масалаларни индивидуал тартибда кўриб чиқишга қаратилади.

 

Жорий йилнинг 11 майидан 26 июлига қадар дизайн-кодни жорий этиш ишлари Тошкент шаҳрининг 56 та кўчасидаги 3 228 та тадбиркорлик субъектини қамраб олган.

 

Жараённинг тадбиркорларга таъсирини ўрганиш мақсадида Тошкент шаҳар ҳокимлиги Савдо-саноат палатасининг ҳудудий бошқармаси билан ҳамкорликда сўровнома ўтказган.

 

Сўровнома натижаларига кўра, айрим ҳолатларда дизайн-код талаблари, зарур ҳужжатларни расмийлаштириш тартиби ва бажарилиши лозим бўлган ишлар кетма-кетлиги ўз вақтида ҳамда етарлича тушунарли тарзда изоҳланмагани аниқланган.

 

Ҳокимлик ушбу эътирозларни ўринли деб топган ва келгусидаги ишларни ташкил этишда мазкур фикр-мулоҳазаларни инобатга олишини билдирган.

 

Маълумотларга кўра, ҳозирга қадар 509 нафар тадбиркор ўз биноси фасадини янгилаган. Яна 2 627 нафар тадбиркорда тегишли ишлар давом этмоқда. Қолган масалалар туман ҳокимликлари ва мутасадди ташкилотлар билан ҳамкорликда индивидуал тартибда кўриб чиқилади.

 

Шунингдек, “Тошкент Инвест Компанияси” АЖ, Рақобатни ривожлантириш ва истеъмолчилар ҳуқуқларини ҳимоя қилиш қўмитаси ҳамда Тошкент шаҳар ҳокимлиги ҳузуридаги Рақамли ривожланиш департаменти экспертлари иштирокида 18 та реклама-ишлаб чиқариш компанияси мутахассисларининг малакаси оширилган.

 

Ҳокимликка кўра, дизайн-кодни жорий этишдан мақсад фақат фасадларни ягона талабларга мослаштириш эмас, балки бу жараённи тадбиркорлар учун тушунарли ва адолатли ташкил этиш, шу билан бирга, пойтахтнинг шаҳарсозлик қиёфасини яхшилашдан иборат.