Тошкентда ЙПХ ходимидан қочган Malibu ҳайдовчиси ушланди
Автомобиль давлат рақамисиз бўлган, олд ва орқа ойналари қорайтирилган ҳолда ҳаракатланган.
Тошкент ҳалқа автомобиль йўлида ЙПХ ходимининг тўхташ талабига бўйсунмаган Malibu-2 ҳайдовчиси ушланди.
Тошкент шаҳар ИИББ ЙҲХБ маълумотига кўра, транспорт воситаси “Уч қаҳрамон”дан Ҳасанбой томон ҳаракатланаётган вақтида аниқланган. Автомобилнинг давлат рақам белгиси бўлмаган, олд ва орқа ойналари қорайтирилган ҳамда орқа қисмига қўшимча антенна ўрнатилган.
Ҳайдовчига рупор орқали тўхташ ишораси берилган. Бироқ у кескин бурилиб, тўхташ талабига бўйсунмасдан ҳаракатини давом эттирган.
Транспорт воситаси тезкор чоралар натижасида ушланган. Ҳайдовчига нисбатан қонунчиликда белгиланган тартибда маъмурий баённома расмийлаштирилиб, автомобиль вақтинча сақлаш учун жарима майдонига жойлаштирилган.
