Туркия Нетаняхуни ҳибсга олиш учун халқаро ордер берди
Туркия аввал ҳам Нетаняху ва Исроилнинг бошқа юқори мартабали амалдорларига нисбатан ҳибсга олиш ордерларини чиқарган.
Туркия Нетаняхуни ҳибсга олиш учун халқаро ордер берди. Қарор Исроилнинг Ғазога гуманитар ёрдам олиб кетаётган флотилияни тўхтатиши юзасидан олиб борилаётган тергов доирасида қабул қилинган. Бу ҳақда Туркия Адлия вазири Акин Гюрлек маълум қилди, дея хабар бермоқда Arab News.
Туркия аввал ҳам Нетаняху ва Исроилнинг бошқа юқори мартабали амалдорларига нисбатан Ғазодаги урушдаги ҳаракатлари сабаб “геноцид” айблови билан ҳибсга олиш ордерларини чиқарган.
“Ғазода геноцид сиёсатини амалга ошираётган Нетаняху ҳукуматини дахлсиз ва жавобгарликдан озод деб ҳисоблаш мумкин деган қарашни қатъиян рад этамиз”, — деди Гюрлек.
Вазирнинг таъкидлашича, Туркия Ғазода содир этилган жиноятларнинг яширилишига ёки уларни содир этган шахсларнинг жазосиз қолишига йўл қўймайди. Анқара айбдорларни жавобгарликка тортиш учун миллий ва халқаро ҳуқуқнинг барча имкониятларидан фойдаланишини билдирди.
Гюрлек Туркия Фаластин халқи, мазлумлар ва инсоният виждони томонида қатъий туришда давом этишини қайд этди. Унинг сўзларига кўра, инсониятга қарши жиноят содир этган шахсларни қонун олдида жавобгарликка тортиш учун барча зарур чоралар кўрилади.
Исроил томони эса Туркиянинг қарорига кескин муносабат билдирди. Нетаняху идораси Туркия Президенти Ражаб Тоййиб Эрдўғанни “антисемит диктатор” деб атаб, Исроил Анқаранинг минтақадаги вазиятни беқарорлаштиришга қаратилган уринишларига қарши қатъий ҳаракат қилишда давом этишини маълум қилди.
