Туркияда бедарак йўқолган ўзбекистонлик эркакнинг жасади денгиздан топилди
Беш киши денгизга тушганида кучли оқимга тушиб қолган. Тўрт нафари қутқарилган, ўзбекистонлик эркак эса оқим томонидан олиб кетилиб, бедарак йўқолган.
Туркиянинг Истанбул шаҳри Шиле туманида денгизда бедарак йўқолган 54 ёшли Ўзбекистон фуқаросининг жасади топилди. Бу ҳақда Hurriyet нашри хабар берди.
Ҳодиса 16 август куни соат 15:15 атрофида Шиле шаҳридаги Масера Парк пляжида содир бўлган. Маълумотларга кўра, беш киши денгизга тушган вақтида кучли оқимга тушиб, чўкиб кетиш хавфи остида қолган.
Воқеа ҳақида хабар берилгач, қирғоқ қўриқлаш хизмати, ёнғин хавфсизлиги ва тез тиббий ёрдам гуруҳлари ҳудудга юборилган. Тўрт киши қутқарилган, ўзбекистонлик эркак эса оқим томонидан олиб кетилиб, бедарак йўқолган.
Шундан сўнг қирғоқ қўриқлаш қайиқлари, ёнғин хавфсизлиги ходимлари ва кўнгиллилар иштирокида қидирув-қутқарув ишлари олиб борилган. Қидирувлар Шиленинг Каракираз ҳудуди ва унинг атрофида, жумладан, ҳаводан кузатув орқали амалга оширилган.
Икки кун давом этган қидирув ишлари натижасида 18 август куни қирғоқ қўриқлаш хизмати эркакнинг жонсиз жасадини денгиздан топган. Марҳумнинг жасади суд-тиббиёт институти ўликхонасига олиб кетилган.
