Ўзбекистонда подездларга кондиционер ўрнатиш тақиқланади
Янги қоидалар 2026 йил 16 ноябрдан кучга киради.
Ўзбекистонда кўп қаватли уйларни сақлаш ва улардан фойдаланиш қоидаларига янги ўзгартиришлар киритилди. Тегишли ҳужжат Адлия вазирлиги томонидан давлат рўйхатидан ўтказилган.
Янги талабларга кўра, кўп қаватли уйларнинг кириш жойларига иситиш ва совутиш ускуналарини, жумладан, кондиционерларни ўрнатишга йўл қўйилмайди.
Шунингдек, кўп қаватли уйлар фасадларидаги нуқсонларни бартараф этиш муддатлари белгиланди. Жумладан, ёриқлар, қоплама ва сувоқнинг шикастланиши, намлик излари ҳамда бошқа нуқсонлар бир ой ичида бартараф этилиши керак.
Подваллардаги асосий иситиш тармоқларида носозлик аниқланган тақдирда, бу ҳақда иссиқлик таъминоти ташкилотига хабар берилиши ва мутахассисларнинг таъмирлаш ишларини амалга ошириши учун уларга кириш имконияти яратилиши лозим.
Лифтлардан фойдаланиш бўйича ҳам янги талаблар жорий этилади. Лифт кабиналарида унинг юк кўтариш қобилияти, йўловчиларнинг рухсат этилган сони, “Хавфсиз лифт” электрон тизимидаги рўйхатдан ўтган рақами, даврий техник кўриклар тўғрисидаги маълумотлар ҳамда хизмат кўрсатувчи ёки авария хизмати ташкилотининг телефон рақами кўрсатилиши керак.
Бундан ташқари, лифт шахталари, машина хоналари ва кириш жойлари тоза ҳамда ёритилган ҳолатда сақланиши белгиланган.
Янги қоидалар 2026 йил 16 ноябрдан кучга киради.
