Эрон Ироқ нефть танкерларининг бир қисмига Ҳормуз бўғозидан ўтишга рухсат берди
Бағдод бу масалани Эрон расмийлари билан муҳокама қилган.
Эрон Ироқнинг такрорий мурожаатларидан сўнг мамлакат нефть танкерларининг бир қисмига Ҳормуз бўғозидан ўтишга махсус рухсат берди. Бу ҳақда Эроннинг IRNA давлат ахборот агентлига таяниб, Reuters хабар берди.
Махсус рухсат олиш масаласи Ироқ парламенти спикери Муҳаммад Боқир Қолибафнинг Ироққа ташрифи чоғида Бағдод томонидан билдирилган асосий талаблардан бири бўлган.
Ироқ Президенти Низар Амедийнинг маълум қилишича, Эрон сўнгги кунларда Ироқ нефтини ташувчи кемаларнинг бўғоздан ўтишини енгиллаштирган. Томонлар Ироқ нефтини Ҳормуз орқали экспорт қилиш масаласини ҳам муҳокама қилган. Шу билан бирга, Амеди масала ҳануз мураккаб эканини таъкидлади.
Ҳормуз бўғозининг амалда ёпилиши Ироққа жиддий таъсир кўрсатган. Ҳозирда бўғоз орқали кемалар қатнови урушдан олдинги даражадан анча паст, ҳудудда кемаларга ҳужумлар ҳам давом этмоқда. Ироқ нефть экспортининг муқобил йўлларини кенгайтиришга уринмоқда.
Хусусан, мамлакат Туркиянинг Жейҳан порти орқали экспортни ошириш, шунингдек, Сурия ва Иордания портлари орқали нефть экспортини бошлашни режалаштирмоқда.
