Россиянинг “Яблоко” партияси парламент сайловларидан четлатилди

 
Россия Олий суди «Яблоко» партиясини парламент сайловларида қатнашиш ҳуқуқидан маҳрум қилди. Партия сайловда иштирок этиш учун рўйхатдан ўтказилганидан кўп ўтмай, унинг номзодлар рўйхатига қарши даъво киритилган ва суд бу талабни қаноатлантирган.

 
Партияни сайловдан чиқариш учун расмий асос сифатида муаллифлик ҳуқуқи билан боғлиқ даъволар ҳамда хориждан маблағ олингани ҳақидаги эътирозлар кўрсатилган. «Яблоко» вакиллари эса бу сабабларни рад этиб, партияни сайлов жараёнидан чиқариш қарори унинг Украинадаги урушга нисбатан позицияси билан боғлиқ эканини таъкидлаган.

 
Партия урушни тўхтатиш ва тинчлик музокараларини бошлаш тарафдори эканини мунтазам билдириб келади. Шу сабабли унинг парламент сайловларидаги иштироки урушга қарши кайфиятдаги сайловчилар учун сиёсий танловлардан бири сифатида кўрилган.

 
Партия раҳбари Николай Рибаковнинг таъкидлашича, «Яблоко»нинг сайловдаги асосий мақсади парламентда кўпчиликни қўлга киритиш эмас, балки Украинадаги урушни имкон қадар тезроқ тугатиш масаласини сиёсий кун тартибида сақлаб қолиш бўлган.

 
Партиянинг сайловдан четлатилиши арафасида унга бўлган қизиқиш ҳам ошган. «Яблоко»нинг ижтимоий тармоқлардаги аудиторияси сезиларли равишда кенгайган, партия номи интернет қидирувларида ҳам аввалгидан кўпроқ учрай бошлаган. Партия тарафдорлари буни урушга қарши қарашдаги россияликлар учун қонуний сиёсий майдонга эҳтиёж ортаётгани билан изоҳлаган.

 
«Яблоко»нинг сайловдан чиқарилиши Москвада норозиликларга ҳам сабаб бўлган. Олий суд биноси олдида партия тарафдорлари йиғилган, айрим намойишчилар полиция томонидан ушланган.

 
Маълумот учун, «Яблоко» 1990 йиллар бошида ташкил этилган. Партия Россия президенти Владимир Путин ҳокимиятга келганидан кейин ҳам парламентдан ташқари мухолиф сиёсий куч сифатида фаолиятини давом эттирган.