Шерзод Асадов “Дўстлик” ордени билан тақдирланди
Шерзод Асадов 2021 йил март ойидан буён президент матбуот котиби сифатида ишлаб келмоқда.
Ўзбекистон Президенти Администрацияси Коммуникациялар департаменти раҳбари — Президент матбуот котиби Шерзод Асадов “Дўстлик” ордени билан тақдирланди.
Шерзод Асадов 2021 йил март ойида Президент Администрацияси раҳбари ўринбосари — Президент матбуот котиби этиб тайинланган. 2023 йил август ойида эса Президент матбуот котиби лавозимига тайинланган.
2025 йил 14 июлдаги Президент фармони билан у Президент Администрациясида янги ташкил этилган Коммуникациялар департаменти раҳбари — Ўзбекистон Президентининг матбуот котиби лавозимига тайинланган.
1981 йил 4 майда Бухоро вилоятида туғилган Шерзод Асадов Жаҳон иқтисодиёти ва дипломатия университетини тамомлаган. У рус, инглиз, испан ва турк тилларини билади.
Асадов меҳнат фаолиятини 2007 йилда Ташқи ишлар вазирлигида бошлаган. Кейинги йилларда Ўзбекистоннинг Сингапур ва Австриядаги дипломатик ваколатхоналарида, Ташқи ишлар вазирлигида ҳамда халқаро ташкилотлар ҳузуридаги дипломатик ваколатхоналарда турли лавозимларда фаолият юритган.
2020 йилдан 2021 йил мартигача Ўзбекистон ташқи ишлар вазирининг ўринбосари лавозимида ишлаган.
